كشتتنا يوم الخميس 06-02-1431هـ

22-01-2010, 06:56

السلام عليكم ورحمة الله وبركاته

مساء / صبآح .... الخير

كيفكم ان شاء الله بخير ونعمه

جاني قرار اداري يوم الاربعاء المغرب انه فيه طلعه يوم الخميس الفجر عاد من بعد صلاة العصر جتنا سحابه الاربعاء ماشاء الله اروت الارض قلت والله عرض مغري مع اني ترددت بس قلت الارض ممطورهـ بروح انبسط
وبعد صلاة الفجر يوم الخميس 06-02-1431هـ
ادرت محرك السياره ودقيت على كم وآحد من الشباب اغلبهم مقفله جوالاتهم واخذت معي ولد الجيرآن من غير الشباب الثاني اللي راحوآ بسياراتهم المهم طلعنآ على سآق الى الفويلق وهناك طبعآ انواع الزحمه لانه الربيع والوناسه والحلال بعدها

عاد مركز الفويلق مليان من الناس البوفيات والملحمه وكل شي المهم مريت ولد العمه واخذته واجتمعنا كل الشله بالبوفيه لاداء وجبة الفطور المهم بعد الفطور اتجهنا للاصبعة - يقع جبل الإصبعة أو هضبة الإصبعه شمال غرب القصيم وتحديدا قرب مركز الفويلق يمكن 20 او 30 كيلو طبعا المنطقة جميلة جدا ولها عشاقها فهي مكان لاهل الحلال اذا ربعت وفعلا الحلال واجد هناك ,وتتميز برملها الأحمر وبهضبتها المميزة على شكل اصبع ويوجد فيها شعبان وطلاح والحطب هناك (رمث ) والأرض فيها ربيع طيب والحلال وأهله مبسوطين هناك -

طبعا حددنا المكان باحدى الشعبان وقعدنا طبعا قريب من الجبل قعدنا سوينا القهوه والشاي وتقهوينا وفليناها وقعد اخي اللي اصغر مني (الشيف) يسوي الغداء والباقين كلنا يعني رحنا للهضبة او الجبل او الاصبع او اللي تبون ...

طبعا قريبه منا مو بعيد طبعا مرينا على احد الحلال واخذنا من الراعي حليب لانه معنا ناس مدمنين حليب بعارين طازج اخذنا طاسه وشرب كم واحد من الشباب

والتقط للحلال كم صورهـ بس قهر نسيت اصور الحليب << اتوقع فيه ناس يقولون احسن

وطلعنا للحاجه (الاصبعه) وفرينا كل المنطقه رجعنا لاخونا الطباخ الساعه 12 وهو على وشك ينتهي المهم تغدينا وبعدين فيه اثنين من الشباب مشوا ماش ماهم راعي بر
وحنا الباقين رحنا اخذنا جوله كبيره مشينا يمكن 2 وطلعنا على الحاجات التاليه : بقيعاء الشماليه - الثابتيه - أم العراد - شويمان والموشم ..

طبعا انا اشغلتهم على الجبل اللي بشويمان لانه فيه نخل وقلت لواحد من زمان قال وشلون عاد انا اخذ الكاميرا معي لاني من يوم قالوا بنطلع هناك قلت بروح اصور شويمان "

طبعا السبب اللي خلنا نتغدى بالاصبعه ولا رحنا شويمان مباشرهـ لانه المطر اكثر الارض رويانه عند الاصبعه اما بعد الثابتيه متفرق المطر "

معنا اخوي الكبير (الدرايفر+ القارمن)

طبعا من الاصبعه طلعنا صحاري ما رحنا للطريق

عاد فيه جبال هناك عند بقيعاء الشماليه وشعبآن تخوف قعدنا نمشي وسطها الظاهر سآعه << تقريبا لا احد يقول لي نصآب

المهم الطريق انواع الفله والوناسه والضحك والاستهبال وكل حاجه

لمين وصلنآ لشويمان والجبل اللي فيه النخل

ونزلت وصورت لكم كذا صورة

وسوينا القهوه والشاي وتقهوينا ورجعنا حول المغرب .

طبعا هناك وسط الجبال المخيفه قعد يسولف اخوي الكبير يقول لي انه فيه ذيابه وحاجات بالليل توحش وقالي انه فيه وسط هالجبال قبور بعد قلنآ ايه بالبر كل شي جائز المهم قال الحين اوريكم يقاله عصب ويطير فينا وسط الجبال كل واحد ماسك مكان خويه من قو السرعه لمين حطنا عند القبر وصورته لكم طبعا فيه اكثر من واحد متفرقات وفيه جنب بعض انا صورت لكم اللي شفت

ورجعنا من البر الى الفويلق مع المغرب وعآد وجلست عند نآس الى 2

وعلى فكره كنت اشجع الشباب لاننا قعدنا نتفرج على المبارآة واخذ الكاس

رجت للبيت الساعه الثانيه صبآحآ وانتهت الرحله بالنوم

اتمنى انكم انبسطتوآ بالمقدمه الطويله

الحين نجي للصور

طبعآ ارجوآ انكم تعذروني لانه يوم جيت هناك وصورة كم صورهـ قالت بطارية الكاميرا انا ضعيفه

كل ما اصور شي تطفي شوي بدين تشتغل يعني يالله وبالله كملت لي كم صورهـ مهمه واعذرونا على الدقه لانه احيانا اصور والسياره تمشي او وانا بالسياره ...

طبعا فيه صور بعارين تخوف اللي يمكن يتحلم بالليل لا يدخل وايضا عند صور البعارين تذكورآ قول الله تعالى ( أفلا ينظرون الى الابل كيف خلقت )

الإصبعة :

(1)

(2)

(3)

(4) - هذا يقولون الخبرهـ اللي معنا انه مريض وغريبه امه مخليته لحاله دايم الام ما تخلي ولدها ابد وياويلك تجيه
هذا مخليته وكل ما جيناه نايم نصحيه نفحط عليه ونمشي

(5) - هذي الاصبعه من بعيد بس مقرب الزوم انا مره والا هو من بعيد تشوفه كبير

(6)

(7) - اللي يخافون لا يشوفون هالصورهـ ترى يمكن يطب مع الشاشه وياكلهم

(8)

(9) - هذي اعجبتي عجازهـ تاكل وهي جالسه < لا احد يسمعك وانت تقول جالسه بلغة اهل البل باركه

(10) - هذي الـ BMW حقت الراعي طبعا منزل بعض الاغراض اللي عليها والا كانت مليانه , يسمى (الركبي)

(11)

(12) - هذي الناقه اللي حلب لنا منها لان يوم جينا وهي داره شوفوآ الولد وهو يشرب سبحآن الله

(13)

(14) - وهذي الاصبعه بعد ما جينها ورقينا شوي كان فيه ناس والتقط صوره من بعيد طبعا مع الزوم صايره صغيره والا اصل الحصاة من بعيد تشوفها كبيره مرهـ

(15) - هذه الصورة توضح الحلال القريب من الاصبعه التقطها وانا فوق عند الاصبع

(16) هذي صورة جبل ساق التقطها وانا عند الاصبع طبعا مقرب الزوم مرهـ
ويبلغ ارتفاع جبل ساق عن سطح البحر حوالي 915 م ويبعد عن الفويلق يمكن 19 كيلو
طلعت له كم مرهـ وخصوصا العام بالربيع لانه كان ربيع والعالم كلها حوله وهو على الطريق يعني ما يحتاج تنزل صحاري علشانه ومصور كذا صورهـ عندي بالجهاز بس اتعيجز انزلهم اللي بيطلبهم بنزلهم له < اغراءات

(17) - صورة من اعلى الاصبعه توضح الحلال فيها

(18) - اها هنا ركزوآ يا بعض النآس
هذا الجبل اللي فيه نخل بشويمان وواضح بالصورة مجرى الماء اللي ينزل علما انه فيه سد للنخل هذا اول ما وصلنا

(19) - هذا بعد ما طلعت شوي وباين صورة السد والنخل مكان فله يفتح النفس

(20) - هذي نخله شاطحه رايحه يسآرهم طبعا بالوسط نخل والاطراف كلها جبال

(21) - هذا بعد ما تعديت النخل اصور لكم انه كل الجوانب جبال

(22) - هذولا بعد شاطحين

(23)

(24)

(25) - هذي الحصاة تبين قدرت الله سبحآنه وتعالى الصرآحه معجزهـ شوفوآ على صغرهآ وشلون ثابته لو احط اكبر منها مرتين هناك طاحت

(26)

(27) - وهذآ القبر اللي اقولكم ( الله يرحم موتى المسلمين ) عاد قال لي اخوي بزيدك معلومات بس الى الحين ما اخذت منه شي

(28) - هذي من الجهه الاخرى علشان ابين لكم انه قريب من الجبل

(29) - هالصورهـ هذي شاطحه بقوهـ عاجز اعيد ترتيب الصور هذي طال عمركم يوم نطلع الاصبعه لقينا اكثر من تجمع للماء طبعا هالماء انا قلت لكم انه الاربعاء اللي هو امس جانا مطر كثير بعد العصر الى حول المغرب وبعد المغرب طبعا المطر الى الثابتيه كثير بعدها متفرق

إلى هنآ اصل الى نهاية صور هذهـ الرحله وكان ودي باكثر وادق بس البطاريه خلصت والوقت ابي اتمشى وانبسط فيه مو اصور

اتمنى تعجبكم الرحله واللي يبي يخاوينا المرهـ الثانيه يرفع يدهـ

محبكم / مخاوي الليل

22-01-2010, 07:00

معلومات منقوله عن جبل شويمان وسآق

جبال الموشم

وكان اسمها قديما ( القَـنَان )

بفتح القاف والنون

يقول امرؤ القيس الكندي في معلقته يصف المطر :

ومَرَّ على «القنان» مِنْ نفيانه *** فأنزل منه العصم من كل منزل

ويقول زهير بن أبي سلمى :

لِسَلمى بِشَرقِيِّ القَنانِ مَنازِلُ = وَرَسمٌ بِصَحراءِ اللُبَيَّينِ حائِلُ

وكان القنان من منازل قبائل أسد وهو لفقعس منهم خاصة وقد كانوا قطاع طرق وكانوا يلجأون إلى القنان خوفا من السلطان .

يقول الشاعر :

ضمن القنان لفقعس سوءاتها = إن القنان لفقعس لمعمرُ

ورد ذكر هذه الجبال كثيرا في شعر العرب . وأجد كثيرا من أسماء جبال العرب

وأماكنهم قد تغير تماما كالقنان .

وبعضها قد تحرف قليلا كأضاخ ( أوضاخ ) وكوادي الجريب ( الجرير )

وبعضها لم يتغير مع طول العهد كضرية وسواج وطخفة وغيرها .

جبال الموشم جبال متعددة الألوان منها الأسود ومنها الجرانيتي الأحمر .

تقع في الشمال الغربي لبريدة على مسافة 100 كم تقريبا .

يتخللها شعاب كثيرة كثيفة الطلح والرمث . من أشهرها وادي الفويلق الذي يتجه شرقا وشعيب أم العراد شمالا .
وشعيب قرنين بين الهضاب .

وفي وسطها وعلى أطرافها قرى عديدة منها : بقيعاء الشمالية والثابتية وأم العراد والمطيوي الشمالي ...

ومن الغرب تقع أرض جميلة تسمى اقمرا ويقع غرب الموشم القرى التالية :

من الجنوب إلى الغرب على التوالي :

الفوارة
الهبيرية
النمرية
سميراء

يعتبر الجزء الشمالي من جبال الموشم هو الأجمل ويسمى سمراء المطيوي وهضاب مشرفات . عند هذه الاحداثية :

2624175
4240297

حيث الشعاب المليئة بأشجار الطلح والرمث .

وحيث الجبال ذات الكهوف والصخور الغريبة الشكل .

جبل ساق

جبل ساق الجوى يقع في منطقة القصيم شامخ الطول منفرد رأس واحد في ارض شبه مستوية
لايوجد فيها جبال قريب منه في حجمه وطوله الشامخ وانه يراه السائر على الطريق الإسفلتي المتجه
من مدينة بريدة إلى المدينة المنورة بعد مايتجاوز رياض الخبراء إلى القرين على يمينه على بعد 30 كيلو
تقريباً وانه ليراه في وضوح إذا كان الجو صافي وهذا الجبل مشهور في منطقة القصيم قديما وحديثا
ولم يتغير من اسمه شي تكلم عنه المؤرخون كثيرا قديما وحاضرا وجاء له ذ كر في الشعر القديم :
ومما تكلم عنه في الوقت الحاضر الأستاذ الشيخ \ محمد ابن ناصر العبودي فقال جبل ساق على لفظ
ساق الإنسان التي يمشي بها جبل اسود هرمي الشكل يرى على البعد شامخا في السماء شديد
الشموخ وهو هضبة واحدة ذات رأس واحد منفردة عن أية صخور أخرى يشملها اسمها : حتى قال يقع
جبل ساق في غرب ناحية الجواء إلى الشمال الغربي من مدينة بريدة وإلى الشمال من رياض الخبراء :
لقد أطال العبودي الكلام حول جبل ساق ولكن نكتفي بهذا القدر وسوف أورد من ماذكر بعض النصوص

الشعرية : قال زهير ابن أبي سلمى

نشزن من الدهناء يقطعن وسطهاشقائـق رمـل بينهـن خمائـلُ
فلما بدت ساق الجواء وصـارةوفـرش وحماواتهـن القوابـلُ
طربت وقال القلب هل دون أهلهاومن جاورت إلا ليـال قلائـلُ

كما أورد نص ابن مقبل الأتي

فليس لها مطلب بعـد مـامررن بفرتاج خوص عجالا
سلكـنَ القنـان بأيمانـهـاوساقا وعرفة ساق شمـالا

كما أورد نص الحطيئة الأتي

نظرت على فوت ضحيٍّ وعبرتيلها من وكيف الرأس شنٌّ وواشـل
إلى العير تحدى بين قوٍّ وضـارجكما زال في الصبح ألإشى الحوامل
فأتبعتهـم عينـيّ حتـى تفرقـتمع الليل عن ساق الفريد الجمائـل

حتى قال وقال خالد ابن جعفر ابن كلاب في الحروب التي سبقت ألبعثه النبوية من قصيدة ٍ :

تركت بني جذيمة في مكـراّونصرا قد تركت لدى الشهودُ
ومني سوف تأتي قارعـاتتبيـد المخزيـات ولا تبيـدُ
وحيّ بني سُبيع يوم( سـاق)تركناهـم كجاريـة وبـيـدُ

كما أورد نص ناهض ابن ثومة الكلابي

حي الديار عراصهن خواليبجماد ساق رسومهنّ بوالـي
محتل احوية عليهـم بهجـةبسواء مشرفة بهم محلالـي
فا إذا غشيتهم سمعت هوادروصواهل ورأيت أحسن حالي
كانوا بهـا فتقسمتهـم نيـةشعواءُ ليس زيالهـا بزيـالِ

ومن النصوص التي أوردها العبودي هذا النص قال كانت منطقة ساق الجواء وماحولها مسرحاً لحروب بين قبيلتي عنزة وحرب وكانت القبيلتان خلال القرن الثالث عشر تتبادلان القصائد والأشعار العامية من ذالك مانسب لأمير عنزة برجس ابن مجلاد في قوله من قصيدة

يا (ساق ) يالضلع الطويلالعـود وصانـي عليـك
لعيون منسـوع الجديـلالحربي مـاوالله يجيـك

فأجابه أحدا شعراء حرب

يا ( ساق ) يالضلع الطويلآ مـن وحـرب تحتميـك
والوايلـي قـفـا ذلـيـلاللي حلف مااحـدٍ يجيـك
فرقى خليـل مـن خليـلفارقك لو وصـي عليـك

كما أورد العبودي هذا النص قال

ومن الحوادث التي وقعت قرب \ ساق \ في العصور الأخيرة مناخ حصل هناك والمناخ يشبه اليوم من
أيام العرب القديمة إلا أن الفريقين المتقاتلين فيه من البادية ينيخ كل واحد منهم ركابه ولا يتحول عن
موضعه إلا منهزم
قال ابن عيسى في حوادث عام 1274هـ وفيها تناوخ عتيبة وحرب بالقرب من \ ساق \ فحصل بينهم قتال
شديد وصارت الهزيمة على عتيبة وقتل من عتيبة نحو ستين رجلا ومن حرب نحو خمسين رجلا : قال
العبودي لا يزال مكان هذا المناخ معروفا وهناك جفر جمع جفرة بالجيم بمعنى حفرة بالحاء تسمى جفر
المناخ ويعنون به المناخ هذا وتقع إلى الشمال الشرقي من جبل \ ساق \ :

كما ذكر هذا المناخ فائز ابن موسى البدراني : فقال

وقعة المليداء بين حرب وعتيبة سنة 1274هـ يعتبر هذا المناخ من المناخات الهامة بين حرب وعتيبة حيث
دام أكثر من شهرين وقتل فيه مايزيد على 100 شخص أكثرهم من عتيبة كما يذكر المؤرخون الذين
عاصروه : وتكلم عنه البدراني كلام كثير نلخص من كلامه مايلي
وقع هذا المناخ في الأطراف الشمالية الغربية للمليداء شرقا من جبل \ ساق \ المشهور في تلك

الناحية وبهذا فهو يعتبر المناخ الوحيد تقريبا الذي وقع بين الفريقين شمال وادي الرمة حتى قال ومن

الأُمراء الذين اشتركوا في هذا القتال من الطرفين هم كالأتي :

من رؤساء قبيلة عتيبة في هذا المناخ

الشيخ تركي ابن حميد شيخ برقا\ والشيخ مسلط ابن ربيعان شيخ الروقة \ والشيخ الهيظل \ والشيخ
الشيباني \ وغيرهم :

من رؤساء قبيلة حرب في هذا المناخ :

الشيخ بدر الفرم شيخ بني علي \ والشيخ ضيف الله الذويبي شيخ بني عمرو \ والشيخ فايز ابن
مريخان شيخ الجملاء من بني سالم \ والشيخ زايد ابن حماد شيخ الفردة \ والشيخ شبيب ابن نحيت
راعي الحيزا شيخ قبيلة مزينة من بني سالم من حرب :

لقد أطال البدراني الكلام حول هذا المناخ ولكن اكتفي بهذا القدر من ماقاله وسوف أورد ماسجله من
قصيدة نايل البشري : والنصوص كثيرة ولكن اكتفي في هذه القصيدة : ومن أراد الأطلاع على
النصوص كاملة فهي موجودة في كتاب فايز ابن موسى البدراني :

قال نايل البشري من بني سالم من حرب : مخاطبا بدر الفرم :

ياسامعين الصوت صلوا على النبيصلـوا علـى نبيـنـا المخـتـار
قـال المزينـي وان بـدا بالمثايـلمني علـى غيـر ألفهيـم إعسـار
ساروا وسرنا ثـم أنخنـا ونوّخـواوالخيـل تـدّب والجمـوع إكبـار
شاديت الجمعيـن ساعـة تواقفـواكمـا هديـب الـشـام بالـمـزار
ربعي بني سالم كما حبـس ظالـمجمع علـى كـل الجمـوع دمـار
مع راعي الحيـزا مطـوّع حريبـهليـا جـا نهـار زاد فـي نـهـار
يثنـي بمذلـوق العرينـي وسابقـهقفـو السـرايـا كنـهـا بهـجـار
يالفرم بيـت الشيـخ جبنـاه حنـاجبناه مـن بيـن الجمـوع اجهـار
جوابه هل العرفاء على وسوق ضمّرصفـر يخلّـن العظـام اكـسـار

كاتب الموضوع \ نافع مطر المرواني
-----------------------------------------------------------------------

المراجع \ العجم الجغرافي لبلاد القصيم \ للشيخ محمد ابن ناصر العبودي ج3\ص1127
فصول من تاريخ قبيلة حرب \ لفايز موسى البدراني الحربي ج1 ص506
عقد الدرر \ للمؤرخ ابن عيسى

22-01-2010, 08:48

يا سبحان الله مدري اخذ اي صوره كلها جنان معد البعارين يمه تخوف خاصه الاسود والى يطالعكم
بسم الله قسم بالله لو لجلس اصيح منهم ههههههههههههه
بس بصراحه جونااااااااااااااان مشاء الله .. القبر الله يرحمه برحمته بالله سوال كيف رحتم هناك
والصخره سبحان الله لله في خلقه شون .. والله قلت لك مدري ايش اخذ من الصور واعلق عليها كلها بصراحه
شي .. بس انا زعلانه ما دقيت على اروح معكم و قلت يالله ( مصدقه الاخت هههههههههههههههه

بس الى مرااح معكم والله خسر اشياء كثيره ..

بس بسال ؟؟ هذا صح بالمملكه واسمه الاصبع ؟ صح تشبه الاصبع انتم قلتم كذا والله هو اسمها ؟

والله مدري ايش اكتب واقولك من ناحيت التقرير والصور وكل شي بصراحه كلمت شكر قليله بحقك ..
عن جد اشياء ما صدق انها بالمملكه .. صح هذا الاماكن فين ؟؟ ( تفكر تروح
عن جد الله يعطيك الف الف الف عافيه عن جد خطيره مشاء الله ولا تبخل علينااا باشياء حلو مثل كذا اطلعو كل يوم سلمت يمناااك على هذا الطرح الرااائع ويستحق التقييم على قولتك مودتي لشخصك الكريم ..

#4 (**permalink**) 22-01-2010, 09:57

اقتباس:

سوال كيف رحتم هناك

اولا : هالمنطقة قريبآ مننا وكل الاماكن اللي بالقصيم عارفينهآ سوى قريب او بعيد .
ثانيآ : كل اهلي راعين طلعآت يعني ما فيه مكان ما رحنا له . خصوصا اللي بالقصيم حافظينهن

اقتباس:

بس بسال ؟؟ هذا صح بالمملكه واسمه الاصبع ؟ صح تشبه الاصبع انتم قلتم كذا والله هو اسمها ؟

اسمها الاصبعة وفيه ناس يقولون الاصبع بس انا اقول لها الاصبعة وفعلا بالمملكة تبين اوصفها لك من وين بتجين لها انتي بس

ولا ازودك بعد من الشعر بيت
فيه اكثر من مكان فله عندنآ فيه حصاة عنتر هو وعبلة بعيون الجواء
وفيه جبل قطن فيه زحليقة بدور لك صور بجهازي له او الخميس الجاي نطلع له واصور لك
وفيه جبال أمره < ما تجي صح الا بالنطق بالكتابه ما راح تقولينها صح المهم ان الميم ساكنه والراء مفتوحهـ هذي فيها شلالات ووناسه بالمطر

وكثآر الامآكن الفلـه

نورتي الموضوع خيتوآ مفاهيم واهم شي انه اعجبك
والمره الجايه اذا طلعت باخذك وبركبك على البعير واطيرك منك الخوف
قبل كذا طلعنا للنفود ولقيت ركبي مع البعارين وركبته بس مدري قبل كم سنه ناسي المهم انا كنا جايين من روضة خريم الظاهر
بعدين لا يسمعك احد وانتي تقولين الاسود البعارين اللي لونها اسود يقال لها المجاهيم

#5 (**permalink**) 23-01-2010, 06:46

يـآآ لبـآ قلبــك والله ..

بجد أجوآآآآآآآآآآء رووووووووووووعـــه ..

وتسلملي يديــــــنــك على هيــــــك تقرير والله ..

بكل تفــآصـيــلـه .., تسلم لي يدينكـ

ولآ تحرمنــآ من هـــيـــكـ حركــتــآت..

...

سلملم الغــآلي.........

23-01-2010, 07:31

اولا : هالمنطقة قريبآ مننا وكل الاماكن اللي بالقصيم عارفينهآ سوى قريب او بعيد .
ثانيآ : كل اهلي راعين طلعآت يعني ما فيه مكان ما رحنا له . خصوصا اللي بالقصيم حافظينه
مشاء الله شي الله يحرسكم ..

اسمها الاصبعة وفيه ناس يقولون الاصبع بس انا اقول لها الاصبعة وفعلا بالمملكة تبين اوصفها لك من وين بتجين لها انتي بس
يا سبحان الله والله توي ادري عنها راح اجيها من الغرب والله اقولك اسحب جدتي من الجنوب واجيكم

ولا ازودك بعد من الشعر بيت ( هات ما عندك

فيه اكثر من مكان فله عندنآ فيه حصاة عنتر هو وعبلة بعيون الجواء
وفيه جبل قطن فيه زحليقة بدور لك صور بجهازي له او الخميس الجاي نطلع له واصور لك ( قسم بالله بس كلام حمستنى لو فعل ايش تسوي فينا هههههههههههه
والمره الجايه اذا طلعت باخذك وبركبك على البعير واطيرك منك الخوف

لا تكفى عز الله مت ولا طار الخوف هههههههههههههههههه

بعدين لا يسمعك احد وانتي تقولين الاسود البعارين اللي لونها اسود يقال لها المجاهيم
المجاهيم هلا والله عاشت الاسامي
هذا 3 مره ادخل الموضوع البنت تحمست لا وجدي عاجبه هذا بسم الله مدري كيف مصورينه ههههههههههههههه

24-01-2010, 12:56

والله تقرير ولا اروووع مشاء الله ماخليت شي ...

تسلم على هيك تقارير خيوو ..

ولا تحرمنا من تقارير قادمه ..

وصراحة كل صووره يبي لها تعليق ع الاقل صفحه .. من روعتها ..

ومشكووور خيووووووووو ..

#8 (**permalink**) 24-01-2010, 07:54

مشكور ..
مشكور..

تسلم ايديكـ,, على التقرير,, الرائعـ,,

#9 (**permalink**) 06-02-2010, 04:44

يسلموو خيوو على الصور
أماكن كلها جيتهاا أنا ولا اذكر اني فكرت أصور
واذا كنت ناوي تروح قطن ولاطابه خل عكووز يعطيني خبر واخاويك <<نشبه الباتكس

06-04-2010, 10:27

بالأول اقول تمنياتي لك اخوي مخاوي اوقات
رائعة وربي يديم لك راحة البال
ثانيا قهرتني ابي اكشت عاد الأجواء بأبها هالأيام
جنان لكن حكم أختبارات أخواني
ثالثا واكثر شئ طير لي عقلي البعارين يالبى قلوبهم
كم اموت عليهم أبوي الله يرحمة كان عندة بعارين
بس باعهم الله يغفر لة

ويلا خخخخخ طولت هذرة تمنياتي للجميع أوقات طيبة